【MIRROR成員】姜濤坦承隊友是競爭對手　視經理人花姐如第二個阿媽

MIRROR的萬人迷姜濤接受鄭裕玲（Do姐）的個人YouTube頻道「The Do Show」專訪，而Do姐問到姜濤事業，當中包括他與經理人花姐（黃慧君）及MIRROR一眾隊友的關係。

Do姐直接問：「花姐由第一日開始就照顧你，佢喺你心目中地位係點㗎？」姜濤回答說：「佢係我第二個阿媽，除咗我阿媽我，例如好多秘密我都冇同阿媽講，但同咗佢（花姐）講，第二個阿媽嘅地位。」

【MIRROR成員】姜濤認入行後有心儀對象　不怕結婚令粉絲夢想幻滅：冇所謂

▲ 「The Do Show」

花姐關心每個成員

於是Do姐問：「佢勸你嘅嘢會唔會聽？」他表示：「其實我喺佢面前唔算一個好聽話嘅人。（Do姐：點解呢？）我唔係一個....因為...我對於音樂上作品上一啲嘢，都會好自我﹑好堅持，例如我唔知道係咪啱，但我想試咗先，就算錯咗都想試，但佢（花姐）就喺一個商業角度，可能覺得例如我好多音樂作品唔太Pop﹑唔太主流，就覺得唔好咁樣，可能呢啲嘢意見會有分歧。」

另外，在生活上，花姐也會給予意見，因此姜濤說：「所以花姐對我哋咁重要原因，唔係只同我哋傾工作，佢會關心我哋每一個人。（你會唔會聽佢意見？）會，有一啲都會，有啲嘢我都唔識處理，第一時間會搵佢。」

▲ 姜濤與花姐。

要知自己係錯

當Do姐問如果有天花姐轉行做其他事，以及要照顧家人，姜濤有何睇法，他回答說：「都好應該嘅，因為其實佢都攰喇，係時候休息下，講真佢係攰過我哋每一個人，同時要處理十幾個人，而佢都冇晒自己生活，如果有一日佢要離開，都要學識接受，唔好依賴﹑唔好挽留。」

而Do姐問現在是否很多事情都可由他自己作主，姜濤也直言：「都係呀，必須要學識。（Do姐：驚唔驚撞板？）唔驚！因為人生好多嘢都被安排好，要去做先冇遺憾。」

她即指：「做錯一個決定，殺傷力都大啲，全世界都知道？」姜濤卻豁達稱：「我覺得呢個份糧包嘅！爸爸做廚師，煮嘢食就唔好驚焫親手，錯咪錯囉，最緊要係夠膽起番身，最重要係你要知道自己係錯，我覺得最可怕係好多人唔知自己錯咗。」

▲ 姜濤在2020年於《叱咤樂壇流行榜頒獎典禮》奪「我最喜愛的男歌手」。（陳慧安 攝）

認《叱咤》表現不夠好

Do姐問姜濤入行至今，有沒有一些覺得自己做得很錯的事？姜濤也坦白稱：「大把啦﹗都分享過好多次，年頭嘅《叱咤》，我之前喺訪問都講咗，的確個表演都做得唔好。每一個表演我認為最好狀態，係將你當下嘅狀態﹑情緒全部表達出嚟，我嗰時狀態情緒係咁，我冇後悔做嗰件事，但係都會承認件事做得唔夠好，所以批評都係啱嘅﹗」

同時，姜濤也承認自己反叛：「我細個好曳。（Do姐：依家撳住自己？）冇特別撳住，當然做人處事又唔好太過自己，但喺表演作品方面，會有某種反叛。」

▲ 姜濤承認在今年初舉行的《叱咤樂壇流行榜頒獎典禮》表現失準。（陳慧安 攝）

隊友之間有競爭

另外，Do姐追姜濤如果有一天不是企「C位」會如何時，姜濤很坦白地說：「我依家唔會講冇乜所謂，其實好多嘢你講冇所謂，都一定唔係真嘅，所以我都話，我都會驚冇咗依家呢一切。」

他甚至十分直接地說：「我成日都話，唔單止我哋呢12個人，因為講真我哋係兄弟之餘，亦係競爭對手，係一個冇辦法嘅一件事情，因為所有團體大家同樣出嚟，都係做同一件事，一定有競爭。」

▲ 2018年11月3日於荷里活廣場舉行「ViuTV 全新男子組合誕生日發佈會」，MIRROR正式宣佈出道。

時常自我檢討

不過姜濤補充指：「但眼光唔可以放咁窄，其實團體有競爭之餘，仲要同香港以外地方競爭，所以當有一日自己唔係所謂C位，或者冇受咁多人注視，其實我嘅性格一定會檢視自己，有乜地方做得好啲，唔可以去埋怨。」

而他指最好方法是檢視自己：「我會提醒自己，我又唔會太擔憂，因為我知自己由細到大都係被睇衰，所以就算有一日被睇衰嘅，都唔緊要。」

最新影片推介：蘇韻姿專訪

精彩獎賞活動等您發掘：https://bit.ly/3ClEy1R